Heilsuhegðun og holdafar : tengsl milli foreldra og barna

Abstract

Hreyfing og hollt mataræði hefur marga jákvæða kosti í för með sér fyrir börn og fullorðna og með því að lifa heilbrigðum lífsstíl verða lífsgæði fólks almennt betri. Byrja þarf snemma að efla líkamsrækt hjá börnum með það að markmiði að koma reglulegri hreyfingu inn í lífsstíl þeirra, í þeirri von að það fylgi þeim til fullorðinsáranna. Ofþyngd og offita er lýðheilsuvandamál sem hefur aukist verulega undanfarin ár og þarf að reyna að sporna gegn þeirri þróun. Foreldrar eru helstu fyrirmyndir barna sinna og því mikilvægt að þau sýni gott fordæmi fyrir börn sín. Rannsóknir hafa sýnt að foreldrar eru helstu félagsmótunaraðilar í lífi ungra barna, því er ekkert skrítið að vísindamenn hafa fundið jákvæð tengsl milli hreyfingar foreldra og barna. Í ljósi þess að hegðun og hreyfing foreldra er stór þáttur í að innleiða heilbrigða heilsuhegðun barna, er áhugavert að skoða helstu ástæður þess. Í þessu verkefni er skoðað hvernig heilsuhegðun og holdafar foreldra hefur áhrif á börn sín og hversu mikilvægt það er fyrir alla að lifa heilsusamlegum lífsstíl til þess að koma í veg fyrir vanheilsu og vanlíðan.