Áhersluþættir grunnskóla við innleiðingu menntastefnu : "Það fer svo lítið nám fram ef börnum líður ekki vel"

Abstract

Lokaverkefni þetta til BA-prófs er eigindleg rannsókn á upplifun starfsfólks grunnskóla af menntastefnu. Meginmarkmið verkefnisins er að varpa ljósi á mikilvægi innleiðingarferlisins þegar kemur að menntastefnu grunnskóla. Rannsóknin er unnin út frá eftirfarandi rannsóknarspurningu: Hvernig hefur menntastefna áhrif á skólastarf og hver er upplifun starfsfólks af menntastefnu grunnskóla? Tilgangur rannsóknarinnar er að skoða hugtakið menntastefna og hver skilningur á hugtakinu er á vettvangi skóla. Rætt var við stjórnendur og kennara um viðhorf þeirra og sýn á menntastefnu og það borið saman við fyrirliggjandi menntastefnu hins opinbera og rannsóknir. Þemun sem komu fram við greiningu gagna eru: Teymiskennsla, Einstaklingsmiðað nám og Gleði og vellíðan í skólastarfi. Þetta voru þeir þættir sem starfsmenn skólans lögðu mesta áherslu á í menntastefnu skólans. Helstu niðurstöður rannsóknarinnar sýna að viðhorf starfsfólks skóla til menntastefnu er almennt jákvætt. Það skiptir þó máli að menntastefnan sé skýr og eftirfylgni lykilatriði til að tryggja það að henni sé fylgt eftir. Mikilvægt er að ríki og sveitarfélög sinni skyldu sinni í eftirfylgni með skólastarfi svo hægt sé að betrumbæta það. Rödd skólastarfsmanna þarf að fá að heyrast þegar kemur að stefnumótun því það eru þeir sem hafa það hlutverk að innleiða menntastefnuna í skólastarfið.