Græn fjármál - Orkuveita Reykjavíkur: Ávinningur heildarinnar

Abstract

Umhverfis- og loftslagsvandinn er eitt af stærstu málum samtímans. Í Parísarsáttmálanum frá árinu 2015 samþykktu ríki heimsins að draga úr losun gróðurhúsalofttegunda til að tryggja að hlýnun jarðar héldist innan við 2°C og helst innan 1,5°C. Þetta háleita markmið krefst mikilla breytinga í samfélaginu og gríðarlegra fjárfestinga á komandi árum. Fjármálamarkaðir munu því gegna mikilvægu hlutverki til að ná fram þeim nauðsynlegu breytingum sem framundar eru. Græn skuldabréf eru einn möguleiki til fjármögnunar á umhverfisvænum verkefnum og hefur áhugi á slíkum bréfum aukist eftir undirritun Parísarsáttmálans, þrýst hefur verið á fjárfesta að beina fjármagni sínu í græn verkefni til að ná megi langtímamarkmiðum á sviði umhverfis- og loftslagsmála. Fjárfestar hafa því í auknum mæli gerst aðilar að reglum Sameinuðu þjóðanna um ábyrgar fjárfestingar og þar með skuldbundið sig að leggja áherslu á samfélagslega ábyrgð og horfa til góðra stjórnarhátta þeirra skipulagsheilda sem fjárfest er í.Orkuveita Reykjavíkur (OR) hefur unnið skipulega að umhverfis- og loftslagsmálum um langa hríð og árið 2019 hóf OR útgáfu grænna skuldabréfa. Árið 2021 gaf OR út ramma grænnar fjármögnunar og með honum er mörkuð sú stefna að fara alfarið í græna fjármögnun, græna skuldabréfa útgáfu auk grænnar lántöku. Sá græni rammi sem OR hefur sett sér er staðfesting á þeim markmiðum að fjármagna eða endurfjármagna verkefni sem stuðla að ábyrgri og sjálfbærri nýtingu auðlinda. Grænn rammi OR fylgir svokölluðum green bond principles viðmiðum útgefnum af ICMA, Alþjóðasamtökum aðila á verðbréfamarkaði, CICERO hefur veitt græna rammanum óháð álit og gefið honum hæstu einkunn, eða dökkgrænn og framúrskarandi fyrir umgjörð skuldabréfanna hjá skipulagsheildinni.Í rannsókn þessari leitaðist höfundur eftir því að ná fram því sögulegu ferli grænnar fjármögnunar OR, og upplifun viðmælenda á því. Er það skoðað sértaklega út frá hagaðilum, stjórnarháttum og stefnum OR.Lykilorð: Umhverfismál, græn skuldabréf, ábyrgar fjárfestingar, stjórnarhættir, stefnur.