„Mér finnst svo gaman að fara með og kynna matinn“ : afstaða sveinsprófsnema í matreiðslu til opinnar vinnuaðstöðu á verknámsstað

Abstract

Hér í ritgerðinni sem á eftir fer verður fjallað um matreiðslunám eins og það fer fram á Íslenskum verknámsstöðum. Skoðað er hvort og hvernig breytingar í innanhússhönnun og umhverfi veitingastaða geti mögulega haft einhver áhrif á störf matreiðslumanna og nema þegar kemur að færni í samskiptum við gesti og gangandi. Rannsókn á áhrifum opins vinnuumhverfis hefur leitt í ljós áhrif til hins betra í samskiptum, orðbragði, starfsánægju og þjónustuvilja gagnvart viðskiptavinum. Þá kveðast einstaklingar, oft konur, telja sig búa við meira öryggi gagnvart áreitni á vinnustaðnum. Í þessari ritgerð varð fyrir valinu að rannsaka hvort greina mætti sambærilega afstöðu, sérstaklega á meðal matreiðslunema hérlendis en einnig var rætt við tvo matreiðslumenn sem hafa starfað í nokkur ár frá útskrift. Tilgangurinn var að kanna afstöðu þeirra til þess hvort að þeir telji að opið eldhús geti haft áhrif á samskipti eða sé yfir höfuð til bóta fyrir þá sjálfa sem fagmenn. Fyrir valinu varð að eiga hálfopin viðtöl við þátttakendur og kanna sérstaklega afstöðu þeirra til ólíkra vinnuaðstæðna með tilliti til verknámsins. Myndsímtöl við sex sveinsprófsnemendur í matreiðslu og tvo matreiðslumenn starfandi á veitingahúsum leiddu í ljós að viðmælendur voru almennt jákvæðir gagnvart opnu starfsumhverfi. Þeir töldu einnig að oft á tíðum gætti óþolinmæði og óþarfa hörku í garð byrjenda í eldhúsinu en álitu að slíkt mætti bæta með markvissari kennslu á námsstöðunum. Þeir töldu einnig mikilvægt að nemarnir fengju að prófa að gera sem mest jafnhliða kennslu frá meistara eða samstarfsmanni. Þeir virtust allir hafa brennandi áhuga á starfinu og álíta áhuga mikilvægan þátt í að samstarfsmenn séu til í að leiðbeina minna reyndum. Þeir töluðu um að með reynslunni og aukinni verklegri kunnáttu hefðu þeir öðlast meiri ábyrgð og viðurkenningu og fundið sterkar fyrir liðsheildinni á vinnustaðnum. Reynslunni hefði svo einnig fylgt gjaldgengi til að fá að reyna sig á öðrum vinnustöðum þar sem kynnast mátti breytilegri vinnuaðstöðu og starfsháttum, þar á meðal opinni sem þeir virtust hafa sóst eftir að fá að reyna.