Tómstundakistan : vefsíða sem heldur utan um framboð tómstunda á landsvísu ætluð fyrir fullorðna sem eru utan vinnumarkaðar

Abstract

Þessi greinargerð er lögð fram sem 10 eininga lokaverkefni til BA gráðu við tómstunda- og félagsmálafræði við Háskóla Íslands. Verkefnið skiptist í tvo hluta. Annars vegar greinagerð og hins vegar afurð í formi tómstundaleitarvélar sem ber heitið Tómstundakistan og verður aðgengileg á vefsíðunni www.minleidupp.is. Markmið Tómstundakistunnar er að styðja við og efla virkni fólks sem er utan vinnumarkaðar. Tómstundakistan leggur áherslu á að skapa vinalegan og vandaðan vettvang til að styðja við endurhæfingu fólks og efla lífsgæði þeirra með gildi tómstunda að leiðarljósi. Tómstundakistan hefur þann tilgang að halda utan um framboð tómstunda á landsvísu á einum stað. Gildir þá einu hvort um er að ræða skipulagt íþrótta- og rafíþróttastarf, tómstundastarf, samfélagsviðburði, félagasamtök og/eða annars konar félög sem hafa það að markmiði að efla, bæta og kæta hversdagsleikann. Seinni hluti verkefnisins er greinagerð þessi þar sem aðaláherslan er á fræðilegan bakgrunn Tómstundakistunnar, uppbyggingu hennar og virkni sem og framtíðarsýn höfundar. Í greinagerðinni er byrjað á að greina og skýra hugtök og kenningar sem tengjast Tómstundakistunni. Má þar nefna tómstundir, frítími, tómstundamenntun og tómstundaráðgjöf. Mikilvægi tómstundaþátttöku er útskýrð og hversu mikið vægi hún getur haft á lífsgæði okkar, heilsu og vellíðan. Í Tómstundakistunni og í þessari greinagerð er stuðst við tómstundahæfnilíkan þeirra Stumbo og Peterson frá árinu 2009 (e.leisure education content model).