Getur ríkið stjórnað internetinu

Abstract

Getur ríkið stjórnað internetinu? Þessi ritgerð reynir að svara því hvort ríkisvaldinu sé yfirhöfuð fært að ná tökum á því hvað fólk gerir og sér á internetinu. Það er þrennt sem veldur helst vandamálum við stjórnun internetsins: Tæknileg uppbygging þess, landfræðileg dreifing notenda internetsins og eðli stafræns efnis. Hönnun internetsins kemur í veg fyrir að því sé miðstýrt en yfirvöld geta samt sem áður sett þrýsting á innlendar netveitur. Með því móti getur ríkið bæði haft áhrif á sýnileika efnis á internetinu og svipt netnotendur nafnleysi sínu. Erfitt er hins vegar fyrir ríkið að hafa reiður á og stjórna netveitum erlendis. Almenningur getur notað þá staðreynd til þess að hylja slóð sína sem og að sjá efni efni sem honum á að vera hulið. Alþjóðlegt eðli internetsins neyðir ríki til þess að vinna saman en það verður ávallt ríkisvald sem ræður á endanum hvað líðst á internetinu og hvað ekki. Farið er yfir heimildir um hönnun internetsins, stuðst við rannsóknir á ríkjum sem takmarka verulega frelsi fólks á internetinu og litið á þær aðferðir sem yfirvöld hér heima hafa notað. Netið er allt um lykjandi miðill sem hefur möguleika á að breyta verulega lifnaðarháttum okkar og því er mikilvægt að átta sig á því hvaða stöðu það hefur gagnvart samfélagslegri uppbyggingu nútímans.