Enginn getur allt - allir geta eitthvað : hugmyndabanki að orðaforðaverkefnum á íslensku fyrir fjöltyngda nemendur

Abstract

Í þessu verkefni er lögð áhersla á hugmyndir fyrir kennara til að efla íslenskan orðaforða nemenda sinna. Verkefnið var upphaflega hugsað fyrir fjöltyngd börn en verkefnin geta verið framkvæmd af hverjum sem er, allt frá byrjendum til lengra kominna, eins nemendur sem eru með íslensku að móðurmáli. Markmið rannsóknarinnar var að afla upplýsinga um hvernig er best að huga að vinnu með fjöltyngdum nemendum og hvernig sú vinna getur skilað sér á sem árangursríkastan hátt fyrir nemendur. Markmiðið var að búa til margvísleg verkefni sem gætu ýtt undir jákvæða sjálfsmynd nemenda og vakið forvitni þeirra á íslenskum orðaforða. Rannsóknarspurningin sem höfð var að leiðarljósi í þessari vinnu var hvað þurfa kennarar að hafa í huga í vinnu með orðaforða fjöltyngdra nemenda svo hún skili sér á árangursríkan hátt? Í greinargerðinni er farið yfir mikilvægi þess að efla orðaforða nemenda ásamt því að skoða af hverju orðaforðinn er mikilvægur fyrir börn sem læra nýtt tungumál. Að auki undirstrikar verkefnið mikilvægi þess að stuðla að jákvæðri sjálfsmynd nemenda og býður upp á leiðir fyrir kennara til að meta árangur nemenda. Í verkefninu er einnig fjallað um réttindi barna, hvernig eigi að koma til móts við nemendur auk þess sem tilurð verkefnisins er skýrð.