Kalli kynnist tómstundum : hvernig er hægt að fræða börn um mikilvægi tómstunda?

Abstract

Kalli kynnist tómstundum er barnabók sem fjallar um strákinn Kalla sem er í 1. bekk í grunnskóla. Hann æfir fótbolta því að flestir vinir hans eru í fótbolta en hann er ekki að finna sig þar. Í bókinni fær Kalli að kynnast fleiri tómstundum með hjálp pabba síns sem er bæði skilningsríkur og víðsýnn. Að lokum finnur hann tómstund við sitt hæfi og áttar sig á mikilvægi tómstunda. Út frá þessari bók geta börn aukið þekkingu sína á tómstundum og þekkt muninn á óskipulögðum og skipulögðum tómstundum. Þá getur bókin einnig hvatt börn og fullorðna til þess að prófa sig áfram í tómstundaiðkun. Þetta verkefni skiptist í tvo hluta, greinargerð og barnabók. Í þessari greinargerð verður fjallað um tómstundir og mikilvægi þeirra, tómstundamenntun, vináttu, mannréttindi barna, félagslega einangrun og barnabókmenntir með fræðslugildi. Í þessari greinargerð verður sýnt fram á mikilvægi tómstunda. Kalli kynnist tómstundum er bók þar sem markmiðið er að fræða börn um tómstundir og myndskreytingar bókarinnar ættu að kveikja áhuga barnsins við lestur.