Tómstundir og fangar : hvert er mikilvægi tómstunda í betrunarferli fanga?

Abstract

Í þessu lokaverkefni til BA gráðu í tómstunda- og félagsmálafræði verður skoðað hvert mikilvægi tómstunda er fyrir betrunarferli fanga og hvernig þær geta auðveldað þeim að aðlagast samfélaginu að lokinni fangelsisvist. Tómstundir eru mikilvægur hluti af lífi allra og fangar eru þar ekki undanskildir. Rannsóknir hafa sýnt að með styðjandi leiðum, m.a. með tómstundaþátttöku, er hægt að draga úr endurkomu fanga. Í fræðilegum hluta ritgerðarinnar verður fjallað um hugtök tómstundafræðinnar, mikilvægi tómstunda, tómstundamenntun, fanga og fangelsismál. Þá verður sjónum einnig beint að mikilvægi félagslegra tengsla fyrir fanga og leiðum sem styðja við að þeir aðlagist samfélaginu á jákvæðan hátt að lokinni fangelsisvist, með áherslu á tómstundamenntun. Niðurstöðurnar benda til þess að tómstundir geti dregið úr endurkomu fanga og þær gegna því mikilvægu hlutverki til að auðvelda föngum að aðlagast samfélaginu að lokinni fangelsisvist.