Fyrstu fasteignakaup: Sparnaðarleiðir fyrir útborgun og mismunur milli húsnæðislána á Íslandi

Abstract

Fasteingaverð á Íslandi á höfuðborgarsvæðinu hefur hækkað mikið á síðustu árum eins og sést á vísitölu íbúðarverðs hjá Húsnæðis- og mannvirkjastofnun. Þar sem fasteignaverð hefur hækkað á síðustu árum er erfiðara fyrir fyrstu fasteignakaupendur að komast inn á fasteignamarkaðinn. Fasteignakaup eru ein af stærstu fjárfestingum lífsleiðarinnar, þeim fylgir skuldbinding til margra ára og því er nauðsynlegt að skoða vel og vandlega alla þætti sem þeim tengjast.Undirbúningur fyrir fasteignakaup er lykillinn að því að eignast fasteign. Í þessari ritgerð verður farið yfir hvaða sparnaðarleiðir fyrstu fasteignakaupendum standa til boða við söfnun til útborgunar. Þar á meðal er séreignasparnaður sem er ein af bestu leiðunum til að safna fyrir útborgun þar sem fyrstu fasteignakaupendur geta nýtt skattahagræði af honum eða notað hann til að niðurgreiða húsnæðislánið. Einnig verður farið ítarlega yfir hvers konar húsnæðislán eru í boði á Íslandi sem og greiðslumat, hlutdeildarlán, helstu tegundir lána, lánstími og öll gjöld sem þessu fylgir. Það er misjafnt hverskonar húsnæðislán hentar hverjum og einum þar sem það getur verið mjög einstaklingsbundið, sumir eru til í að taka meira áhættu á meðan aðrir kjósa frekar öryggi.