Fjármögnun hryðjuverka. Greining á 100. gr. b. almennra hegningarlaga nr. 19/1940 með hliðsjón af hryðjuverkahugtaki 100. gr. a. hgl.

Abstract

Ísland er aðili fjölmörgum alþjóðasamningum sem hafa það markmið að sporna við hryðjuverkum og fjármögnun þeirra. Þrátt fyrir að aldrei hafi verið framin hryðjuverk á Íslandi, né nokkur dæmdur í íslenskum dómstólum fyrir að fjármagna hryðjuverkastarfsemi, hefur Ísland háttað sinni löggjöf þannig að þung refsing er lögð við því að fremja hryðjuverk, fjármagna þau eða á annan hátt liðsinna eða eiga hlutdeild að slíkum verknaði. Hryðjuverkaákvæði almennra hegningarlaga nr. 19/1940 er að finna í 100. gr. a. – 100. gr. c laganna. Fyrirmynd ákvæðanna var lagafrumvarp danska dómsmálaráðuneytisins um sama efni. Með því frumvarpi voru sett hryðjuverkaákvæði dönsku hegningarlaganna, 114. gr. – 114. gr. j. dhgl.Í umfjölluninni hér á eftir verður gerð grein fyrir forsögu og aðdraganda íslenskrar hryðjuverkalöggjafar og þeirra krafna sem gerðar eru í alþjóðasamningum um hryðjuverk. Þá verður fjallað um uppbyggingu og efnisatriði 100. gr. a. hgl. og hvernig ákvæðið mótar hryðjuverkahugtak íslensks refsiréttar með samanburði við 114. gr. dhgl. Að lokum verður fjallað um 100. gr. b. hgl. og ákvæðið borið saman við 114. gr. b. dhgl. og sjónum beint að því hvort að heimfæra megi beitingu danskra dómstóla á 114. gr. b. hgl. yfir á 100. gr. b. hgl.