Aðgengi að menntun fyrir börn með sérþarfir

Abstract

Aðgengi að menntun fyrir alla hefur verið tryggt á undanförnum árum með lögum og reglugerðum. Skólakerfið gegnir þar stóru hlutverki til að framfylgja þeim lögum sem gilda og tryggja aðgengi að menntun fyrir alla. Áskoranir sem börn geta glímt við eru þó nokkrar og mikilvægt að komið sé til móts við þarfir þeirra til að tryggja jákvæða námsframvindu þeirra. Markmið með þessari ritgerð er að skoða hvort aðgengi að menntun sé til staðar fyrir öll börn hérlendis og að varpa ljósi á helstu atriði sem hafa þarf í huga er varðar nemendur sem glíma við sérstakar áskoranir í íslenska menntakerfinu og hvað þurfi að vera til staðar til að uppfylla þau skilyrði sem börnin þurfa til að blómstra. Leitast var við að svara eftirfarandi rannsóknarspurningu: Er aðgengi að menntun fyrir öll börn á Íslandi? Niðurstöður ritgerðarinnar sýna að lög sem gilda hérlendis eiga að tryggja rétt allra til náms óháð hvers kyns mismunun en að skólakerfið sé ekki endilega í stakk búið til að takast á við þessar áskoranir. Einnig sýna niðurstöður fjölmargar áskoranir sem geta haft áhrif á námsframvindu nemenda sem eru með námsörðugleika, athyglisbrest með eða án ofvirkni (ADHD) og börn sem hafa upplifað áföll eða búa við bágar félagslegar aðstæður. Út frá niðurstöðunum má ætla að mikilvægt sé að skólar taki tillit til þessara barna, hlúi að þeim og aðstoði þau við að byggja upp seiglu og sterka sjálfsmynd.