Brúin milli kirkjustarfs og hversdagslífs: Lífsreynsluguðfræðileg nálgun á fjölskylduboðun

Abstract

Í þessari ritgerð er fjölskylduboðun (e. family ministry) skoðuð út frá sjónarhóli lífsreynsluguðfræði (e. lived theology) en það er nýleg nálgun innan hagnýtrar guðfræði. Hér er beint sjónum að svokölluðum líkönum fyrir fjölskylduboðun (e. family ministry models). Þessi líkön eru hugsuð sem ólíkar leiðir fyrir kirkjur til þess að boða kristna trú til fjölskyldna. Auk þess eru þau hugsuð sem leið til að efla og styðja við foreldra í að kynna og iðka kristna trú fyrir börnunum sínum. Hér verður gengið út frá því að helsta vandamálið við þessi líkön tengist því hvernig þau skilgreina fjölskylduna út frá hverjir tilheyri henni og hvaða hlutverkum þeir gegna. Á þeim forsendum verður því ný nálgun sett fram sem byggð er á lífsreynsluguðfræði og tengslamiðari þrenningarguðfræði (e. trinitarian relational theology). Sú nálgun er ekki hugsuð sem sérstakt líkan heldur leið fyrir kirkjur til þess að móta sitt eigið líkan fyrir fjölskylduboðun út frá samtali við bæði söfnuð og sókn.