Tungumálainngilding og íslenskukennsla fyrir innflytjendur á vinnumarkaði

Abstract

Í þessari ritgerð er sjónum beint að tungumálainngildingu og íslenskukennslu fyrir innflytjendur á vinnumarkaði og nokkrum helstu kenningum um kennslu og tileinkun annars máls. Fræðimenn hafa rannsakað málefnin á margvíslegan hátt og fram hefur komið að tungumálið er ekki einungis jafnréttismál heldur líka mannréttindamál. Fjölbreytni, jöfnuður, sanngirni, inngilding og nám án aðgreiningar í kennslu annars og erlends máls er fyrirliggjandi verkefni sem hefur það að markmiði að auka vitund um fjölmenningarlega menntun og koma félagslegu réttlæti inn í tungumálanámskrár. Þar að auki hefur verið bent á að tungumál er ekki aðeins tungumálakerfi orða og setninga, heldur einnig félagsleg framkvæmd þar sem samið er um sjálfsmyndir og langanir í samhengi við flókin og oft ójöfn félagsleg tengsl. Þess vegna, þegar nemendur læra annað tungumál, læra þeir ekki aðeins hóp reglna og orðaforða sem sameinast og búa til merkingarbærar setningar, heldur hafa þeir einnig aðgang að nýjum rýmum þar sem inngangur og réttur til að tala er takmarkaður af ójöfnum valdatengslum. Þessi valdatengsl taka meðal annars mið af sjálfsmynd nemenda. Kynþáttur þeirra, kyn og kynvitund, trúarbrögð, tungumálabakgrunnur, þjóðerni, félagsleg og efnahagsleg staða, meðal annarra þátta, hafa veruleg áhrif á hvernig þeir skilja heiminn og sjá fyrir sér nýju samfélögin sem þeir eru að reyna að komast inn í þegar þeir læra annað tungumál.