Bakpokinn - öll út!

Abstract

Við sem störfum á vettvangi frítímans upplifum oft að börn á frístundaheimilum kvarta hástöfum vegna útiveru í byrjun starfsdags: „Mér leiðist úti, það er ekkert að gera, má ég koma inn?“ Mikilvægt er að við sem fagfólk á vettvangi frítímans séum hvetjandi fyrirmyndir í útiveru því hluti af þroska barna er að gera eins og þau sem þau líta upp til. Útinám býður upp á margt eins og sýnt verður fram á þessu verkefni, en verkefnið er tvískipt: Fræðileg greinargerð og Bakpoki með leiðarvísi. Bakpokinn hefur slagorðið Öll út! og er sniðinn að starfi frístundaheimila þótt hann nýtist í öllu starfi með yngri börnum. Markmið Bakpokans er að kynna fyrir fagfólki hagnýt staðartengd verkefni sem hvetja börn til útiveru og leiks. Verkefnin nýta möguleika grænna svæða í nærumhverfi frístundaheimila og skóla með fjölbreyttum hætti. Í greinargerð verkefnis verður fjallað um þann fræðilega bakgrunn sem leiðarvísirinn og Bakpokinn byggist á, þar á meðal skilgreiningar á hugtökum. Leiðarvísirinn lýsir innihaldi og útbúnaði Bakpokans. Bakpokinn er mikilvægt framlag til að stuðla meiri útiveru yngri barna á Íslandi.