Áhrif CSRD tilskipunarinnar á stjórnarhætti, stjórnskipulag og ferla skráðra félaga á Íslandi

Abstract

Tilgangur rannsóknarinnar var að kanna hvort og þá hverju fyrirtæki þurfa að breyta í stjórnarháttum, stjórnskipulagi og ferlum til þess að uppfylla nýjar kröfur Evrópusambandsins um sjálfbærniupplýsingagjöf (CSRD). Rannsóknin fylgir eigindlegri aðferðafræði og byggir á viðtölum við stjórnendur félaga sem starfa í ólíkum atvinnugreinum og eru skráð í Kauphöll Íslands, ásamt greiningu á ESRS stöðlum um stjórnarhætti (ESRS 2 og ESRS G1). Viðtölin voru afrituð, kóðuð og þemagreind. Niðurstöður leiddu í ljós að CSRD tilskipunin leiðir til breytinga á hlutverkum og ábyrgð sjálfbærnimála, breytinga á störfum og verksviði deilda, nýrra fjárfestingaráforma og viðskiptatækifæra. Innleiðingin krefst þverfaglegrar teymisvinnu, vinnustofa og samvinnu margra deilda og sérfræðinga.Fáar rannsóknir eru til um áhrif CSRD tilskipunarinnar á starfsemi félaga, enda er um nýja tilskipun að ræða. Af þeim sökum þótti mikilvægt að rannsaka hvaða áhrif tilskipunin hefur á starfsemi félaga, sem standa frammi fyrir innleiðingunni, með það fyrir augum að bæta við nýrri þekkingu á sviðinu. Rannsóknin veitir innsýn í áhrif CSRD tilskipunarinnar á starfsemi skráðra félaga á Íslandi, nýmæli í tilskipuninni, aðferðafræði tvöfaldrar mikilvægisgreiningar og sjálfbærniupplýsingagjöf eftir ESRS stöðlunum.Lykilorð: Sjálfbærni, CSRD, stjórnarhættir, skipulagsform, viðskiptalíkan, rekstrarumhverfi