Prentsmiðja Hafnarfjarðar 1946-2007

Abstract

Markmið þessarar ritgerðar er að skoða eina af fjölmörgum prentsmiðjum sem Íslendingar hafa átt og sögu hennar. Hvernig fór undirbúningur svona prentsmiðju fram og hvað þurfti til á 20. öldinni til að setja hana á laggirnar. Guðmundur Ragnar Jósefsson, stofnandi Prentsmiðju Hafnarfjarðar, fór í ferð til New York árið 1945 þegar seinni heimstyrjöldin var að líða undir lok. Hann fór í þeim tilgangi að afla sér meiri þekkingar, skoða prentvélar og festa á þeim kaup. Hann skrifaði daglega í dagbók og sagði frá ferðalaginu og því sem hann tók sér fyrir hendur í New York. Sagt er frá verkefnum sem Prentsmiðja Hafnarfjarðar vann, sem eru mörg hver varðveitt á Þjóðskjalasafni Íslands. Steinunn Guðmundsdóttir, kona Guðmundar Ragnars, tók við rekstri prentsmiðjunnar þegar Guðmundur Ragnar lést. Hennar saga er sett í samhengi við atvinnuþátttöku kvenna og þeirra sögu innan prentiðnaðarins í lok 19. aldar og á 20. öldinni. Hlutverk prentsmiðja í samfélaginu var annað á 20. öldinni en nú og er því skoðað hvort hefðbundnar prentsmiðjur, eins og Prentsmiðja Hafnarfjarðar, geti starfað enn í dag. Notast er við ýmiss konar heimildir í verkefninu eins og bækur um sögu prents á Íslandi, ritaða ævigrein um Guðmund Ragnar og Steinunni og viðtal við Ingibjörgu, dóttur þeirra, sem síðar tók við rekstri prentsmiðjunnar ásamt systur sinni Guðrúnu.