Spuni, lausn allra vandamála? : möguleg áhrif spuna á klassískt tónlistarnám

Abstract

Þótt það hafi ekki farið hátt þá á spuni stóran þátt í tónlistarsögunni. Í raun er öll tónlist komin af spuna. Ekki er talið að spuni og klassísk tónlist eigi mikla samleið en eitt sinn var ætlast til þess að klassískir hljóðfæraleikarar gætu spunnið á staðnum eða unnið út frá ákveðnu efni. Spuni var einnig notaður til þess að veita einleikurum vettvang til þess að sýna fram á getu sína sem flytjanda. Hugarfar margra gagnvart spuna hefur þó breyst síðustu áratugi og eru til rannsóknir sem sýna fram á hvað spuni getur verið gagnlegur og þá sérstaklega í kennslu. Í þessari ritgerð verður fjallað um spuna í tónlist í víðu samhengi og vildi ég kanna hvaða áhrif spuni getur haft á klassískt tónlistarnám. Ég tók viðtal við núverandi nemanda við Listaháskóla Íslands, Diljá Finnsdóttur víóluleikara, sem hefur í námi sínu gert sér grein fyrir mikilvægi spuna og þeirra áhrifa sem hann getur haft á okkur sem tónlistarfólk sem og í daglegu lífi. Svo virðist vera sem spuni geti haft virkilega jákvæð áhrif á tónlistarnám og meðal annars aukið sjálfstraust og sköpunargleði nemanda, ýtt undir frumkvæði og minnkað framkomukvíða. Það sem vantar helst til að auka spunakennslu í klassísku tónlistarnámi er að virkja kennara og opna meira á samræðuna um hvað spuni er gott verkfæri fyrir tónlistarfólk. Spuninn sjálfur er bæði gagnlegur og gefandi og hægt er að nýta sér hann á svo margan og fjölbreyttan hátt.