Um sambandið á milli orða og mynda

Abstract

Orð og myndir. Myndir og orð. Á hverjum degi notum við þessi fyrirbæri og tökum þeim sem sjálfsögðum hlut. Þau eru ólík en eru samtímis eitt helsta samskiptatól mannfólksins. Oft nýtast þau saman en stundum standa þau ein. Það er þó alltaf einhvers konar ósýnilegur þráður sem tengir þau saman. Í þessari ritgerð verður leitast við að greina hver þessi þráður sé og hvernig orð og myndir vinna saman, en jafnframt hver sé munur á notkun og skilningi mannfólksins á myndum og ritmáli. Fjallað verður um sambandið sem ríkir á milli þessa tveggja hugtaka og notkun þeirra í samfélaginu. Til þess að svara þessum spurningum verður fjallað um hugtakið læsi í víðri merkingu, sem er í raun hæfileiki einstaklinga til þess að skilja og skynja umheiminn í kringum sig. Að vera læs snýst ekki aðeins um að kunna að lesa ritað mál heldur tekur hugtakið á sig margvísilegar myndir. Til þess að geta komið upplýsingum á framfæri og þróast sem einstaklingur er einnig mikilvægt að vera læs á menningarheiminn sem maður býr við og myndirnar sem í honum birtast. Einnig verður farið yfir hugtakið mynd út frá skilgreiningu rithöfundarins W.J.T. Mitchell en hann telur myndir vera marglaga fyrirbæri sem erfitt sé að skilgreina og þar af leiðandi útskýra. Á eftir myndum verður fjallað um ritmál. Hugtakið er skilgreint og farið er yfir helstu ritkerfi heimsins og þeirra einkenni og þar á eftir verður fjallað um LoCoS sem er tákmyndatungumál sem blandar saman orðum og myndum á hnitmiðaðan hátt til þess að koma upplýsingum auðveldlega á framfæri. Í lok ritgerðarinnar verður fjallað um sambandið á milli orða og mynda. Það verður skoðað út frá almennu sem og samhengi við tíma og rúm. Hugtakið framsetning verður skoðað út frá listfræðilegu og samfélagslegu samhengi og merking orða verður tekin fyrir út frá skilgreiningu heimspekingsins Ludwig Wittgenstein. Í lokin verður farið yfir kenninguna um tvíkóðun þar sem því er haldið fram að myndir séu geymdar í tveimur rásum í heilanum en orð aðeins í einni rás. Að lokum er efni ritgerðarinnar dregið saman í niðurlagskafla.