Skulda- og áhættustýring sveitarfélaga

Abstract

Markmið verkefnisins er að rannsaka hvernig skulda- og áhættustýringu sveitarfélaga á Íslandi hefur verið hagað til þessa og hvort eitthvað megi fara betur í þeim efnum. Notast er við aðferðir og hugmyndir úr skuldastýringu (e. debt management) og eigna- og skuldastýringu (e. asset & liability management) til að setja fram aðferð til að stýra skuldum og áhættu vegna skulda á þann hátt sem hentar sveitarfélögum og þeirra tilgangi. Lítið sem ekkert hefur verið skrifað um þetta efni á íslensku og ekkert efni hefur verið gefið út sem fjallar um heppilegt form á skuldastýringu íslenskra sveitarfélaga.Helstu niðurstöður ritgerðarinnar eru tvær. Sú fyrri er að þörf er á sérhæfðari fjármálaþjónustu fyrir sveitarfélög en hingað til hefur verið í boði, en sveitarfélög hafa í mörgum tilvikum fengið sömu áhætturáðgjöf og einkarekin fyrirtæki þrátt fyrir þann grundvallarmun sem er á þeim. Seinni niðurstaðan er sú að rými er fyrir betrumbætur á sviði skuldastýringar sveitarfélaga. Má þar helst nefna að sveitarfélög þurfa að setja fram skýrari stefnu varðandi skuldir og að meiri áherslu má leggja á að samræma skuldir við tekjuflæði í þeim tilgangi að minnka áhættu vegna skulda.