Stæðnigreining á jarðvegsfláum

Abstract

Þessi rannsókn fjallar um stöðugleika fláa með áherslu á áhrif vatnsborðs og jarðefna á öryggisstuðul fláa. Til rannsóknar voru tekin jarðvegssýni úr fláa á Nesjavöllum, þar sem mælingar og prófanir voru framkvæmdar á rannsóknarstofu til að greina kornadreifingu, rúmþyngdog skerstyrk jarðvegs. Niðurstöðurnar voru nýttar til útreikninga í hugbúnaðinum Slide, þar sem stöðugleiki fláa var metinn eftir mismunandi aðstæðum og jarðefnum.Niðurstöðurnar sýna að hækkandi vatnsborð hefur marktæk áhrif á stöðugleika fláa. Þegar vatnsborðið hækkar, eykst vatnsþrýstingur í jarðveginum sem dregur úr virkri spennu og skerstyrk. Þetta veldur lækkun á öryggisstuðli, sérstaklega í léttari og fíngerðum efnum eins ograuðamöl. Á móti sýna þyngri og grófari efni meiri stöðugleika gagnvart hækkandi vatnsborði þar til vatn mettast í fláanum, en þá lækkar öryggisstuðullinn verulega.Þessi rannsókn undirstrikar mikilvægi þess að taka mið af jarðvegsgerð og vatnsstöðu við hönnun og framkvæmd fláa. Greiningin veitir dýrmæt gögn sem nýtast við að bæta öryggi og hagkvæmni í jarðvinnuverkefnum.