Stórhátíð neysluhyggjunnar. Afleiðingar óhóflegrar neyslu á jólunum

Abstract

Eftirfarandi heimildaritgerð er lokaverkefni til BA-gráðu Í félagsráðgjöf við Háskóla Íslands og fjallar um áhrifaþætti óhóflegrar neyslu á jólahátíðinni og afleiðingarnar sem hún hefur í för með sér. Neysla hefur aukist verulega á síðustu áratugum og með henni fylgja margvíslegar áskoranir: fjárhagslegar, sálrænar, líkamlegar og umhverfislegar. Þetta er sérstaklega áberandi á jólahátíðinni, þar sem væntingar og félagslegur þrýstingur leiðir til aukinnar neyslu og streitu. Markmið ritgerðarinnar er að varpa ljósi á hvaða afleiðingar óhófleg neysla hefur fyrir einstaklinga og samfélög. Félagsráðgjafar geta spornað gegn neikvæðum afleiðingum óhóflegrar neyslu með tveimur aðferðum: auknu fjármálalæsi og grænni félagsráðgjöf. Fjármálalæsi hjálpar fólki að auka skilning á eigin neysluhegðun og stuðlar að sjálfstjórn og fjárhagslegu öryggi. Græn félagsráðgjöf tengir félagslega og vistfræðilega velferð og veitir einstaklingum tæki og tól til að lifa sjálfbærara lífi. Niðurstöður benda til þess að jólin þurfa ekki að vera neysluhátíðin sem hún er í dag, heldur má leggja meiri áherslu á sjálfbærni og grunngildi jóla: kærleika og samveru.