Á bakvið tjöldin. Skuggafélagslíf í framhaldsskólum

Abstract

Markmið þessa verkefnis er að varpa ljósi á og skilgreina fyrirbærið skuggafélagslíf og greina þau óformlegu samskipti og athafnir sem það felur í sér. Skuggafélagslíf er hluti af sviði óformlegs félagslífs sem mótast að miklu leiti utan ramma skólakerfisins og er skipulagt af nemendum sjálfum. Það birtist á fjölbreyttan hátt og getur tekið á sig ýmsar myndir eftir skólaumhverfi, nemendahópum og menningu hverju sinni. Rannsóknir benda til þess að félagslíf sé einn af þeim lykilþáttum sem hafa úrslitaáhrif þegar kemur að vali nemenda á framhaldsskólum og hefur djúpstæð áhrif á upplifun þeirra og þátttöku í skólasamfélaginu. Það getur styrkt tengslanet nemenda, stuðlað að félagslegri færni og eflt persónulegan þroska en á sama tíma getur það einnig ýtt undir útilokun, hópþrýsting og áhættuhegðun. Með því að auka skilning á bæði skipulögðu félagslífi á vegum framhaldsskóla og skuggafélagslífi er hægt að vinna að því að skapa jákvæðan skólabrag fyrir alla nemendur. Aukinn skilningur á skuggafélagslífi getur veitt innsýn í hvernig óformlegt félagslíf hefur áhrif á skólamenningu, jafnrétti innan skólanna og líðan nemenda. Jafnframt er mikilvægt að skoða hvernig skólar og samfélag geta brugðist við þeim áskorunum sem fylgja skuggafélagslífi og nýtt styrkleika þess til jákvæðrar þróunar í félagslífi nemenda.