The Effects of Physical Therapy on Concussion Symptoms in Mild Traumatic Brain Injury: A retrospective study

Abstract

Bakgrunnur: Vægir höfuðáverkar eru vaxandi lýðheilsuvandamál sem er áætlað að hafi áhrif á 69 milljón manns árlega. Þeir geta leitt til langvarandi einkenna sem krefjast endurhæfingar. Þrátt fyrir það er hlutverk sjúkraþjálfunar í einkennaúrlausn enn óljóst. Markmið þessarar rannsóknar var að meta áhrif sjúkraþjálfunnar í kjölfar höfuðáverka á bata einkenna með því að nota SCAT-6 einkennakvarðann í almennu þýði.Aðferðir: Afturvirk greining var framkvæmd á 310 einstaklingum (meðalaldur 35.2 ára, 67,4% konur) sem leituðu meðferðar vegna vægra höfuðáverka hjá Heilaheilsu. Af þeim luku 172 þátttakendur bæði inntöku- og eftirfylgnimati með SCAT-6 einkennalistanum. Blönduð dreifigreining (e. mixed model ANOVA) var notuð til að meta mun á grunnlínu og yfir tíma, fjölþátta línuleg aðhvarfsgreining var notuð til að meta forspárþætti SCAT-6 stiga við eftirfylgni, á meðan lógístísk aðhvarfsgreining greindi lýðfræðilega forspárþætti fyrir aðgengi að endurhæfingu. Marktektarmörk voru sett við p < 0,05.Niðurstöður: Þátttakendur sem fengu sjúkraþjálfun (n = 91) og þeir sem fengu hana ekki (n = 81) sýndu báðir fram á bætingu í SCAT-6 stigum. Hins vegar var munurinn á stigalækkun milli hópanna ekki marktækur (p = ,501). Alvarleiki einkenna við inntöku var helsti forspárþáttur hærri einkenna við eftirfylgni (p < ,001). Aldur tengdist marktækt því að fá sjúkraþjálfun (p = ,029).Ályktanir: Þessar niðurstöður styrkja mikilvægi alvarleika einkenna í upphafi við að spá fyrir um batahraða vægra höfuðáverka. Þó að þátttaka í sjúkraþjálfun tengdist alvarleika einkenna, spáði hún ekki marktækt fyrir um útkomu endurtekna mælinga. Þessar niðurstöður undirstrika þörfina á stöðluðum endurhæfingaraðferðum, hlutlægum útkomumælingum og einstaklingsmiðuðum, lýðfræðilega næmum meðferðaráætlunum í meðhöndlun vægra höfuðáverka.