Sjálfbær framtíð flöskuvatns : hlutverk samfélagslegrar ábyrgðar : greining á áskorunum og tækifærum í útflutningi á íslensku vatni

Abstract

Á sama tíma og heimsmarkaður flöskuvatns stækkar hratt eykst þrýstingur á framleiðendur um að sýna fram á ábyrgð gagnvart náttúru og samfélagi. Ísland, með ímynd hreins grunnvatns og vistvænnar nýtingar, hefur laðað að sér athygli á þessu sviði, en ímyndin ein og sér dugar ekki alfarið. Þessi ritgerð skoðar hvernig íslensk vatnsútflutningsfyrirtæki, Iceland Spring, Vök Waters og Icelandic Glacial, bregðast við kröfum um sjálfbærni og samfélagslega ábyrgð, bæði í stefnu og framkvæmd. Viðtöl og opinber gögn sýna að fyrirtækin standa frammi fyrir flókinni stöðu: annars vegar eru tækifæri til að aðgreina sig með staðbundnum gæðum og gagnsæi, en hins vegar hamla skortur á regluverki, flutningskostnaður og vantraust á grænni markaðssetningu. Áhersla erlögð á að sjálfbærni verði ekki hliðarverkefni heldur hluti af kjarna viðskiptamódelsins með mælanlegum aðgerðum, gagnadrifinni upplýsingagjöf og virku samráði við hagaðila. Flöskuvatnsframleiðsla krefst heildrænnar sýnar sem nær út fyrir ímynd og inn í virk samskipti við samfélag og vistkerfi. Það er í þessari spennu á milli aðgreiningar og ábyrgðar sem möguleikar íslenskra vatnsútflutningsfyrirtækja til langtímaárangurs liggja. Í ljósi þessara aðstæpna veitir þessi rannsókn skýra sýn á hvernig samfélagsleg ábyrgð og sjálfbærni þróast úr markaðsslagorðum í rekstrartengda nauðsyn.