Jöfn en ólík : tvær ólíkar leiðir til að stuðla að kynjajafnrétti í leikskólum

Abstract

Þessi ritgerð er til fullnustu B.Ed. prófs við Menntavísindasvið Háskóla Íslands. Markmiðið er að varpa ljósi á hvers vegna kynjajafnrétti sé mikilvægt í leikskóla. Rannsóknarspurning ritgerðar er: Hvernig er hægt að stuðla að kynjajafnrétti í leikskóla? Henni er svarað með því að skoða skrif fræðimanna og leiðir sem hafa verið farnar til að stuðla að kynjajafnrétti í leikskólum. Farið er yfir nokkrar rannsóknir á því hvernig börn upplifa kynímyndir, hvernig kynjamismunun birtist innan skólans og hvert hlutverk kennarans er. Bornar verða saman leið Hjallastefnunnar sem notast við kynjaskiptingu og hins vegar leiðir sem farnar voru í þróunarverkefni sem stóð yfir í eitt ár og bar nafnið Jafnréttisfræðsla í leik- og grunnskóla sem Jafnréttisstofa stóð fyrir ásamt fleiri samstarfsaðilum en þar var lagt upp úr markvissri fræðslu um jafnréttismál. Helstu niðurstöður eru að ýmislegt styður mikilvægi þess að stuðla að kynjajafnrétti í leikskóla. Ýmsar leiðir virðast færar að kynjajafnrétti í leikskólum hvort sem notast er við kynjaskiptingu eða kynjablöndun.