Ímynd tryggingafélaga á Íslandi

Abstract

Ritgerð þessi fjallar um ímynd tryggingafélaga á Íslandi. Rannsakandanum er ekki kunnugt um að rannsóknir hafi verið gerðar á ímynd tryggingafélaga á Íslandi, fyrir utan mælingar Íslensku ánægjuvogarinnar. Núverandi efnahagsástand er án fordæma í sögu lands og þjóðar. Megin markmið rannsóknarinnar er að reyna að bregða ljósi á hvort núverandi aðstæður hafi haft áhrif á ímynd stærstu tryggingafélaganna á markaðinum, og þá einkum í ljósi þeirrar neikvæðu umfjöllunar sem hefur verið um eignarhald stærstu tryggingafélaganna. Rannsóknarspurningin sem sett er fram:Tengjast tryggingafélög sem fjallað hefur verið mikið um í fjölmiðlum vegna eignarhalds þeirra, spillingu í hugum neytenda? Rannsakandinn notaðist við megindlega aðferðafræði. Fimmtán staðhæfingar neikvæðar og jákvæðar voru settar fram til að meta ímynd tryggingafélaga í hugum þátttakenda. Niðurstöður rannsóknarinnar voru birtar á vörukorti. Aðeins eitt af þeim fjórum tryggingafélögum sem rannsökuð voru tengist sterkt spillingu í hugum þátttakenda. Niðurstöðurnar benda til þess að tryggingarfélögunum hafi ekki farist sérstaklega vel úr hendi að staðfæra sig í hugum neytenda, fyrir utan eitt. Þá benda niðurstöður einnig til þess að þrátt fyrir neikvæða umfjöllun um tryggingafélög séu aðeins 16% þátttakenda líklegir eða mjög líklegir til þess að skipta um tryggingafélög á næstu mánuðum.