Tökum tillit til skoðana barna. Samanburður á þátttöku barna í barnaverndarmálum á Íslandi og í Noregi

Abstract

Vitundarvakning hefur orðið á síðastliðnum áratugum á mikilvægi þess að hafa samráð við aðila í barnaverndarmálum, börn þar með talin. Barnasáttmálinn, lög landa og margar rannsóknir hafa hvatt til þátttöku barna í eigin málefnum. Tilgangur þessarar heimildaritgerðar var að skoða hver þátttaka barna í barnavernd á Íslandi hefur verið síðastliðin ár og bera stöðuna saman við sambærilega stöðu í Noregi. Einnig var tilgangurinn að varpa ljósi á það hvernig félagsráðgjafi getur aukið hlutdeild barna innan barnaverndar með vinnuaðferðum sínum. Til þess að komast að ofangreindu var notast við fræðilegar heimildir, skýrslur, rannsóknir og lög sérstaklega frá þessum tveimur löndum. Í ljós kom að norska löggjöfin kveður á um þátttöku barna frá sjö ára aldri á meðan sú íslenska miðar við þátttöku frá 12 ára aldri og er ólík aldurskipting í löggjöfunum. Þátttaka barna virðist vera nokkuð svipuð í báðum löndunum en börn eldri en 12 ára fá yfirleitt taka þátt meðan þátttaka yngri barna er mjög takmörkuð. Vilji er fyrir því að börn taki þátt í barnaverndarmálum meðal starfsmanna. Félagsráðgjafi getur eflt þátttöku barna með vinnuaðferðum sínum, þá sérstaklega valdeflingu og með því að tileinka sér aðferðir til að ræða við börn.