Áhrif sértæks Aurora-A kínasahindra á brjóstaþekjufrumulínur með stökkbreytingu í BRCA2 geninu

Abstract

Brjóstakrabbamein er algengasta krabbameinið hjá konum á Íslandi og má áætla að ein af hverjum tíu konum muni greinast með brjóstakrabbamein á lífsleiðinni. Meiri hluti brjóstakrabbameina eru tilkomin vegja tilviljanakenndra sómatískra stökkbreytinga en þó má rekja næstum fjórðung þeirra til ættlægra galla í erfðamenginu. Einn af þessum erfðagöllum er stökkbreyting í BRCA2 geninu, en hún erfist með Mendelskum erfðum og finnst í 7-8% brjóstakrabbameinstilfella á Íslandi. Það sem einkennir þær konur sem eru arfblendnar með þessa stökkbreytingu er að þær þróa með sér krabbameinið fyrr en þær sem hafa ekki stökkbreytinguna, og einnig eru þær í aukinni hættu á að fá krabbamein í eggjastokkana. Sýnt hefur verið fram á að Aurora-A kínasinn er magnaður upp í BRCA2 krabbameinum og oft þýðir það verri horfir fyrir sjúklinginn. Því eru núna miklar vonir bundnar við sértæka Aurora-A kínasahindra og tilvonandi meðferðarmöguleika þeirra í framtíðinni.