Hvernig virkar heimurinn? Námspil í eðlis- og efnafræði

Abstract

Lokaverkefni okkar er hönnun námspils í eðlis- og efnafræði. Spilið heitir Hvernig virkar heimurinn? og er ætlað nemendum á unglingastigi grunnskóla en möguleiki er að nýta það á miðstigi, einna helst í 7. bekk. Spilið er spilað af liðum eða hópum og ýtir þannig undir það að nemendur vinni saman en stuðlar ekki að of mikilli samkeppni nemenda. Verkefnin eru af tólf gerðum, allt frá spurningum til leikrænnar tjáningar og tilrauna. Fjölbreytileikinn er því mjög mikill og verkefnin tengjast fjölda kennsluaðferða. Markmið spilsins er að nemendur öðlist skilning á námsefni í eðlis- og efnafræði á fjölbreyttan og skemmtilegan hátt með því að sjá og upplifa hlutina. Þá á spilið að ýta undir læsi og hugtaka- og tungumálaskilning á náttúrufræðihugtökum með því að nemendur þurfa að tjá sig um og með hugtökum í eðlis- og efnafræði. Spilið gerir ráð fyrir að kennari sé stjórnandi og dómari svo að á verkefnunum eru ekki svör heldur fylgja kennaraleiðbeiningar sem gefa dæmi um svör. Verkefnin eru einnig hugsuð til að nýtast sem kveikjur og kennsluhugmyndir fyrir kennara.