,,Hvað fæ ég?" : óskir og væntingar fólks með þroskahömlun um flutning úr foreldrahúsum

Abstract

Ritgerð þessi fjallar um væntingar fólks með þroskahömlun þegar það flytur úr foreldrahúsum. Einnig er ætlunin að varpa ljósi á það hvort væntingum fólks með þroskahömlun sé mætt þegar það flytur að heiman. Ritgerðin byggist á niðurstöðum rannsóknar sem unnin var á tímabilinu september 2010 til mars 2011. Markmið rannsóknarinnar er að gera grein fyrir væntingum sem ungt fólk með þroskahömlun hefur til flutnings úr foreldrahúsum og skoða hvort væntingum þeirra sé mætt þegar það flytur að heiman. Rannsóknin var unnin eftir eigindlegum rannsóknaraðferðum. Gagna var aflað með viðtölum og þátttökuathugunum. Þátttakendur í rannsókninni voru sjö einstaklingar með þroskahömlun. Fjórir af þessum einstaklingum stefna á að flytja að heiman í náinni framtíð en þrír þeirra fluttu úr foreldrahúsum fyrir tveimur árum eða innan tveggja ára. Þátttakendur voru á aldrinum 22 ára til 41 árs. Niðurstöður rannsóknarinnar benda til þess að ungt fólk með þroskahömlun hefur væntingar og óskir þegar kemur að því að flytja úr foreldrahúsum og væntingum þeirra er að mestum hluta mætt þegar þau flytja að heiman.