Börn, ungmenni og tómstundir: hver er ávinningur barna og ungmenna með fötlun af tómstundaiðkun?

Abstract

Þessi ritgerð fjallar um ávinning tómstundaiðkunar hjá fötluðum börnum og unglingum. Fjallað er um hversu virkt félagslíf hefur áhrif á líf fatlaðs einstaklings jafnt líkamlega sem andlega. Ýmsar kenningar eru skoðaðar og reynt að skilgreina hugtakið tómstund út frá fræðunum og þeim kenningum sem fjalla um hugtakið. Greint er frá hvernig tómstundir geta dregið úr félagslegri einangrun, en jafnframt hversu jákvæð áhrif þær hafa á líðan þess sem þær stunda. Ritgerðin er í formi heimildaritgerðar sem gerir það að verkum að allar þær upplýsingar sem eru í ritgerðinni eru studdar með heimildum. Reynt er að skoða alla þá þætti sem snúa að tómstundaiðkun fatlaðra barna og ungmenna og þannig að átta sig á mikilvægi þeirra félagslegu tengsla sem myndast milli einstaklinga við tómstundaiðkun. Fimm spurningum, sem fyrirfram voru ákveðnar, er svarað með tilliti til þeirra heimilda sem unnið var út frá. Loks er niðurstöðukafli þar sem efnið er tekið saman og niðurstaða kynnt út frá túlkun höfundar.