Spuni, hreyfing og leikgleði : hugmyndabanki fyrir tónmenntakennara þar sem þjóðararfurinn er bæði miðill og efniviður

Abstract

Kennsluefnið „Spuni, hreyfing og leikgleði: Hugmyndabanki fyrir tónmenntakennara þar sem þjóðararfurinn er bæði miðill og efniðviður” er lokaverkefni mitt til B.Ed. prófs við Kennaradeild Menntavísindasviðs Háskóla Íslands. Kennsluefnið er hugmyndabanki ætlaður fyrir tónmennta- og jafnvel leiklistarkennara á yngsta stigi í grunnskóla. Efnið er að miklu leyti byggt upp eftir hugmyndafræði tónskáldsins og tónlistarkennslufrömuðarins Carls Orffs, þar sem lögð er áhersla á hryn- og spunavinnu í gegnum tungumálið, hreyfingu, leik og hljóðfæri. Hugmyndabankinn miðast við að nemendur kynnist og læri íslensk þjóðlög, rímur og kvæði en leiki sér um leið með efniviðinn í takt við markmið tónmenntakennslu. Arfleifðin verður því bæði miðill og efniviður. Eitt meginmarkmið kennsluefnisins er að safna þjóðlegu efni í sarpinn enn um leið að efla frumkvæði, þor og sköpunarmátt nemenda í gegnum söng, hljóðfæraleik, hreyfingu og leik. Með kennsluefninu fylgir greinargerð sem ætlað er að skýra út hugmyndafræði Carls Orffs sem kennsluefnið er byggt á.