Vísindaspuni : greinargerð með spili ætlað til styrkingar hugtakanáms í náttúrufræðum

Abstract

Í greinargerð þessari er lýsing á námsspili um hugtök í náttúrufræðum sem undirrituð hefur hannað og lagður fram rökstuðningur fyrir gildi þess. Spilið er hugsað sem kennsluefni fyrir náttúrufræðikennara. Markmið spilsins er að styrkja hugtakanám í náttúrufræðum. Við val námsefnis er unnið út frá markmiðum aðalnámsskrár og efni spilsins er tekið upp úr námsefni nemenda á unglingastigi grunnskólans. Spilið er hannað til notkunar á unglingastigi grunnskólans en nýtist þó öllum þeim sem vilja kynnast hugtökum náttúrufræðinnar og fræðast um þau.Námsspil er hægt að nýta í kennslu á margvíslegan hátt. Þau má nýta til upprifjunar, til að kynna nemendur fyrir nýju námsefni, sem upprifjun á efni sem búið er að fara yfir eða sem þjálfunaræfingar. Þau má nota á öllum stigum grunnskólans, jafnt á unglingastigi sem og með yngri börnum enda hafa allir aldurshópar gaman af því að spila.Hugmyndafræði spilsins byggir á því að nemendur doki við hugtök náttúrufræðanna, ígrundi þau og öðlist dýpri skilning á hugtakinu og tengslum þess við skyld hugtök. Nám í náttúrufræðum byggir m.a. á því að nemendur tileinki sér tungumál vísindanna og kunni skil á þeim hugtökum sem mynda hugmyndabanka vísindanna. Hugtök náttúrufræða hafa sum hver ólíka merkingu í daglegu tali en sem vísindalegt hugtak. Markmið þessa spils er að þjálfa minni og skilning nemenda á hugtökum náttúrufræðanna í gegnum leik og höfða til breiðs hóps nemenda.