Áhrif Skólahreysti á íþróttakennslu í grunnskólum landsins

Abstract

Rannsóknarefnið um Skólahreysti var unnið á vorönn 2011. Lagðar voru fram tvær rannsóknarspurningar, fyrri spurningin var hvort Skólahreysti hafi breytt íþróttakennslu í grunnskólum landsins og sú seinni var hvort áhugi barna og unglinga á íþróttum hafi aukist síðan Skólahreysti hófst en stofnendur Skólahreysti hófu þessa keppni til að reyna að vinna gegn hreyfingarleysi ungmenna í landinu. Samdir voru tveir mismunandi spurningalistar, annar þeirra var sendur á íþróttakennara víðs vegar um landið en hinn var sendur á stofnendur Skólahreystis. Þegar spurningalistarnir frá íþróttakennurunum skiluðu sér til rannsakanda var hafist handa við að bera saman svör þeirra. Niðurstöðurnar voru þær að langflestir skólar landsins taka þátt í Skólahreysti og kennslan í flestum skólum breytist á einhvern hátt þegar fer að líða að keppninni. Allir íþróttakennararnir sem tóku þátt í könnuninni voru sammála um að þetta væri mjög flott keppni og voru almennt ánægðir með þær greinar sem væri keppt í.