"Allir eru öðruvísi..." : fötlun í barnabókmenntum

Abstract

Tilgangur verkefnisins er að varpa ljósi á mikilvægi barnabókmennta sem tæki til að móta viðhorf til fötlunar og fatlaðs fólks. Segja má að barnabækur hafi í gegnum tíðina haft tvenns konar hlutverkum að gegna. Annars vegar hafa þær haft visst afþreyingargildi og hins vegar hafa þær fengið það mikilvæga hlutverk að fræða og kenna börnum. Í verkefninu er horft til þessa fræðslugildis og sérstaklega með tilliti til fötlunar. Ljóst er að í gegnum tíðina hefur fötlun í barnabókum ýtt undir ýmsar staðalímyndir sem eru ríkjandi í samfélaginu. Það er því bæði á ábyrgð þeirra sem skrifa bækurnar og þeirra sem þær lesa með börnum að taka til umræðu þær staðalímyndir sem í þeim birtast. Til grundvallar þeirri sögu sem ég skrifaði valdi ég að hafa félagslegan skilning á fötlun og hugmyndafræðina um sjálfstætt líf. Ég valdi þessa hugmyndafræði því mér finnst hún leysa vel af hólmi hugmyndir um eðlilegt líf og fulla samfélagsþátttöku sem á undan ríktu. Í starfi mínu sem þroskaþjálfi kýs ég að miða vinnu mína út frá þeim hugmyndum sem fatlað fólk kemur fram með og þess vegna kaus ég félagslegan skilning á fötlun og hugmyndafræðina um sjálfstætt líf sem bakgrunn þessa verkefnis.