is Íslenska en English

Lokaverkefni (Meistara)

Háskóli Íslands > Félagsvísindasvið > Meistaraprófsritgerðir - Félagsvísindasvið >

Vinsamlegast notið þetta auðkenni þegar þið vitnið til verksins eða tengið í það: http://hdl.handle.net/1946/9935

Titill: 
  • Forgangur krafna við gjaldþrotaskipti og slit fjármálafyrirtækja
Námsstig: 
  • Meistara
Leiðbeinandi: 
Útdráttur: 
  • Gjaldþrotaskipti eru sameiginleg fullnustugerð allra lánardrottna tiltekins skuldara. Við gjaldþrotaskipti er meginreglan jafnræði kröfuhafa. Reglur um mismunandi rétthæð krafna við úthlutun úr þrotabúi eru því undantekning frá meginreglunni. Helsti ágreiningur um rétthæð krafna snýst um svokallaðar forgangskröfur samkvæmt 112. gr. laga nr. 21/1991 um gjaldþrotaskipti o.fl. („gþl.“). Forgangskröfum fjölgaði með breytingu á lögum nr. 161/2002, um fjármálafyrirtæki með lögum nr. 125/2008, um heimild til fjárveitingar úr ríkissjóði vegna sérstakra aðstæðna á fjármálamarkaði o.fl. Inn í lögin var bætt við nýju ákvæði um að innstæður samkvæmt lögum um innstæðutryggingar og tryggingakerfi fyrir fjárfesta nr. 98/1999 nytu rétthæðar samkvæmt 112. gr. gþl.
    Þunginn í ritgerðinni er á forgangskröfur með það að markmiði að varpa ljósi á helstu álitaefni er varða slíkar kröfur með sérstöku tilliti til dómaframkvæmdar. Einnig verður fjallað um tengsl búskrafna samkvæmt 110. gr. gþl. og forgangskrafna samkvæmt 112. gr. gþl. með sérstöku tilliti til launakrafna. Íslensku gjaldþrotaskiptalögin eru í grunninn byggð á dönskum lagareglum en eru þó um margt frábrugðin. Verður þannig ekki komist hjá því að fjalla um nokkur hliðstæð ákvæði dönsku gjaldþrotaskiptalaganna samhliða þeim íslensku þar sem það á við. Efnisskipan verður með þeim hætti að í kafla 2 verður gerð grein fyrir helstu grundvallarhugtökum skuldaskilaréttarins sem þýðingu hafa í ritgerðinni. Í kafla 3 verður farið yfir almenn skilyrði gjaldþrotaskipta en krafa um gjaldþrotaskipti kemur annaðhvort frá skuldara sjálfum eða er að kröfu lánardrottins. Í kafla 4 verður fjallað almennt um kröfur í þrotabú. Gerð verður grein fyrir hugtakinu krafa og fyrstu aðgerðum skiptastjóra við gjaldþrotaskipti. Þá verður hugað að áhrifum gjaldþrotaskipta á kröfur á hendur þrotamanni en meginreglan er sú að allar kröfur á hendur þrotabúi falla sjálfkrafa í gjalddaga við uppkvaðningu úrskurðar héraðsdómara um að búið sé tekið til gjaldþrotaskipta. Því næst verður fjallað um heimild kröfuhafa til að framfylgja kröfum á hendur þrotabúi. Reifaðar verða meginreglur og undantekningar um form og efni kröfulýsingar og áhrif vanlýsingar. Þá verður í kafla 5 gerð grein fyrir rétthæð krafna við úthlutun en þessi hluti ritgerðarinnar er jafnframt sá veigamesti. Sérstaklega verður fjallað um búskröfur samkvæmt 110. gr. gþl. áður en fjallað verður ítarlega um forgangskröfur samkvæmt 112. gr. gþl. Þá verða tengsl þessara flokka krafna skoðuð sérstaklega. Því næst verður fjallað um Ábyrgðasjóð launa. Sjóðurinn hefur mikilvægu hlutverki að gegna í tengslum við gjaldþrot en sjóðurinn tryggir launamönnum og lífeyrissjóðum greiðslur vegna vangoldinna krafna þeirra við gjaldþrot vinnuveitanda. Ábyrgð sjóðsins er háð því skilyrði að kröfurnar hafi verið viðurkenndar sem forgangskröfur samkvæmt 112. gr. gþl., með fyrirvara um takmarkanir og frávik sem kveðið er á um í lögum um Ábyrgðasjóð launa nr. 88/2003. Í kafla 6 verða síðan niðurstöður teknar saman.

Samþykkt: 
  • 7.9.2011
URI: 
  • http://hdl.handle.net/1946/9935


Skrár
Skráarnafn Stærð AðgangurLýsingSkráartegund 
_MA-ritgerð-FINAL.pdf545.86 kBOpinnMeginmálPDFSkoða/Opna
Forsíða FINAL.pdf50.46 kBOpinnForsíðaPDFSkoða/Opna